គណៈបញ្ជាការឯកភាពខណ្ឌ ដឹកនាំដោយលោក ឌី រ័ត្នខេមរុណ អភិបាលរង ចុះបិតអាជីវកម្មសិប្បកម្ម ផលិតទឹកម្ទេស ទឹកសៀង ដែលបង្កការប៉ះពាល់ សុខភាព ប្រជាពលរដ្ឋនៅភូមិឬស្សី៣
28-April-2018 | ដោយ ពលមនសិការ
ភ្នំពេញ ៖ លោក ឌី រ័ត្នខេមរុណ អភិបាលរងខណ្ឌមានជ័យ បានទទួលបញ្ជាពីលោកពេជ្រ កែវមុនី អភិបាលខណ្ឌមានជ័យ ដឹកនាំកម្លាំងមន្ត្រីជំនាញ អង្គភាពមន្ទីរ ពាក់ព័ន្ធ ចុះបិតទីតាំងសិប្បកម្ម ផលិតទឹកម្ទេស ទឹកសៀង ដែលបង្កការប៉ះពាល់ សុខភាព ដល់ប្រជាពលរដ្ឋក្នុងក្រុមទី៧ ភូមិឬស្សី៣ សង្កាត់ស្ទឹងមានជ័យទី២ ខណ្ឌមានជ័យ កាលពីព្រឹកថ្ងៃទី២៧ ខែមេសា ឆ្នាំ២០១៨។
លោកអភិបាលរងខណ្ឌបានឲ្យដឹងថា ទីតាំងផលិតទឹកម្ទេស ទឹកសៀង ប្រេងខ្យង ដែលកន្លងមកគណៈកម្មការចម្រុះ រួមទាំងមន្ត្រីជំនាញ បានចុះត្រួតពិនិត្យ លើផលប៉ះពាល់ តាំងពីថ្ងៃ១៥ ខែធ្នូ ឆ្នាំ២០១៧ ម្តងរួចមកហើយ ដោយទុក រយៈពេល ៦០ថ្ងៃ ក្នុងការរុះរើ និង ប្តូទីតាំងថ្មី ក្រោយមន្ត្រីជំនាញ និង បច្ចេកទេស បានរកឃើញផលប៉ះពាល់ មាន៦ចំនុច ដូចជា៖ ទី១-ចំហាយទឹកម្ទេសចេញពីឡចំហុយបង្កជាក្លិន ឈួលខ្លាំង ស្ទើរទ្រាំពុំបានដល់អ្នករស់នៅជិតខាងរហូតកន្លងមកធ្លាប់មាន អ្នកឈឺជាបន្តបន្ទាប់ព្រោះតែសុខភាពខ្សោយមិនអាចទ្រាំទ្រក្លិនឈួលនេះបាន, ទី២-អំរែងភ្លើងហ៊ុយចេញ ពីឡចំហុយ ហុយចូលផ្ទះបងប្អូន ប្រជាពលរដ្ឋ, ទី៣-សម្លេងរ៉ឺម៉កម៉ូតូដឹកអីវ៉ាន់ ពុំមានស៊ីមាំង ត្រឹមត្រូវ,ទី៤- កម្មករដាក់ឥវ៉ាន់ពេលយប់ មានសំលេងរំខាន ស្រែក ឡូឡាដល់អ្នកជិតខាង,ទិ៥-មិនមានស្តង់ដាផលិតតាមបទដ្ឋានបច្ចេកទេសត្រឹមត្រូវ នឹងទី៦- យានយន្តចតដឹកផលិតផល ចតលើផ្លូវបង្កការស្ទះចរាចរ ។
លោកបានបន្ថែមថាដោយក្រុមការងារ និង មន្ត្រីជំនាញ បានទទួលការ ដឹកនាំផ្ទាល់ពីលោក ពេជ្រ កែវមុនី អភិបាល នៃគណៈអភិបាលខណ្ឌមានជ័យ តម្រូវអោយបិតអាជីវកម្ម ផលិតទឹកម្ទេស ទឹកសៀង មិនអោយប្រកបអាជីវកម្មទៅពេលខាងមុខ ទៀតត្រឹមថ្ងៃ សុក្រ ទី២៧ ខែមេសា ឆ្នាំ២០១៨ ជាស្ថាពរតែម្តង ។
ម្ចាស់អាជីវកម្ម ឈ្មោះ សេង រដ្ឋា បានឯកភាពបិត និងរុះរើ មិនអោយហួសពីថ្ងៃសុក្រ តាមការស្នើសុំរបស់អាជ្ញាធរខណ្ឌ និង មន្ត្រីជំនាញ របស់មន្ទីរពាក់ពន្ធ័ឡើយ។ ទើបនៅវេលាម៉ោង០៨ព្រឹក ថ្ងៃទី២៧ ខែមេសា ឆ្នាំ២០១៨នេះ មានការបញ្ជាផ្ទាល់ពីលោក ពេជ្រ កែវមុនី អភិបាលខណ្ឌមានជ័យ នោះ លោក ឌី រត្ន័ខេមរុណ អភិបាលរងខណ្ឌមានជ័យ បានដឹកនាំកម្លាំងមន្ត្រីជំនាញ អង្គភាពមន្ទីរ ពាក់ព័ន្ធចុះបិតទីតាំងសិប្បកម្ម ផលិតទឹកម្ទេស ទឹកសៀង ដែលបង្កការប៉ះពាល់ សុខភាព ដល់ប្រជាពលរដ្ឋនោះ ដោយធ្វើការដកហូតវត្ថុតាងមួយចំនួនធំ យកទៅរក្សាទុកនៅសាលាខណ្ឌមានជ័យ៕
ចំនួនអ្នកទស្សនា
- ថ្ងៃនេះ191
- ម្សិលមិញ10851
- សប្តាហ៍នេះ66711
- ខែនេះ181861
- ឆ្នាំនេះ181861
- សរុប20624317